Beýik işleri etmezden beýik bolup bolmaýar

Özüne beýik diýilmegini halamýan kiçigöwünli, pespäl hakyky döwlet ýolbaşçysynyň keşplerini özünde jemlän Saparmyrat Türkmenbaşynyň Watan üçin, türkmen halky, il-ýurt üçin bitiren ägirt işlerinden mysallar.

• Garaşsyz, özbaşdak Türkmenistan döwletini döretdi

• Türkmenistana bitaraplyk statusyny alyp berdi

• Ýurtda agzybir, parahat ýaşaýyş şertlerini döretdi

• Ölüm jezasyny ýatyrdy

• Her ýylyň gadyr gijesinde günä geçmegi kanunlaşdyrdy

• Din azatlygyny berdi, metjitleri gurmaga rugsat etdi we olaryň birnäçesini hut özi açdy

• Gurban baýramyny bellemek barada perman çykardy we baýram günlerini üç gün iş güni däl diýip yglan etdi

• Türkmeniň däp-dessurlaryny gaýtaryp berdi

• Türkmene özüniň hakyky taryhyny gaýtaryp berdi

• Täze bilim syýasatyny döretdi. Bilimde uly özgerişmeleri geçirdi. Ilkinji halkara ýokary okuw jaýyny we mekdeplerini açdy. Şol sanda türkmen-türk mekdepleriniň açylmagynyň gözbaşynda Saparmyrat Türkmenbaşynyň hut özi durýar. Türkmenistanly ýaşlara dünýäniň islendik ýurdunyň ýokary okuw jaýyna okuwa girmäge şert döretdi

• Halkyna gazy, elektrik toguny we duzy mugt etdi

• Galla garaşsyzlygyny döretdi

• Ykdysady taýdan örän ähmiýetli Sarahs — Maşat halkara we Türkmenabat — Atamyrat ýurdiçi demirýollaryny gurdurdy

• Dünýä standartlaryna doly jogap berýän “Türkmenhowaýollaryny” döretdi

• Türkmenistanyň häzirkizaman dokma senagatynyň düýbüni tutdy

• Dünýäde deňi-taýsyz at tohumy bolan ahal-teke atlarynyň tohumynyň ýitip gitmeginiň öňüni aldy

• “Gök guşak“ paýdarlar jemgyýetini döredip, millionlarça düýp agaç oturdylmagyny gurnady

• Aşgabat şäheriniň durkuny täzeledi

Bu sanawy gutarnykly ýazmak mümkin däldir. Emma ýokardaky sanalan işler hem olary bitiren adama beýik diýilmegi üçin ýeterlikdir. Şol işleriň diňe biriniň başyny başlap, ahyryna çenli alyp baryp bilen adamam öz ömründe uly iş bitirdim diýip arkaýyn aýdyp biler. Çünki olaryň diňe birini amala aşyryp bilmek hem är ömrüne ýeterlik. Beýik Serdarymyz bolsa Türkmenistanda ösüşe tarap ädilen her bir ädimiň, her bir döwletli başlangyjyň sakasynda durýar. Onuň bu işjeňligine, beýik başlangyçlary tapmak, olary guramaçylykly başlamak we ahyryna çenli ýetirmek ukybyna görenler, eşidenler haýran galýarlar. Hatda bu kitapçanyň çapa taýýarlanylýan döwürlerinde-de Saparmyrat Türkmenbaşynyň täze bir bitiren ägirt işiniň şaýady bolup bileris. Beýik adamlaryň her güni beýik işler bilen geçýär.